Nombro de infektitoj en Ĉinio superis tiun de SARS
Merkredo, la 29-a de januaro 2020
.svg)
Nombro de infektitoj en Ĉinio atingis 6052, kio superas ciferojn de Saroso — epidemio, kiu en 2002-2003 infektis 5325 kaj mortigis 349 homojn en la kontinenta Ĉinio kaj pli ol 600 tutmonde. Ĉi-foje nombro de la mortintoj jam atingis 132, el kiuj 125 en la provinco Hubejo.
La ciferoj kreskas ĉiutage kaj rapide. La 28-an de januaro nur en Hubejo estis registritaj pliaj 840 konfirmitaj infektiĝoj. Ĉirkaŭ 3300 homoj estis enhospitaligitaj en Hubejo, pli ol 20 mil observataj. Kuracistoj diras ke plejparto de la mortintoj aĝis pli ol 60 jarojn kaj havis sanproblemojn.
Tibeto sciigis pri la unua suspektata kazo, kio signifas ke la viruso atingis la lastan ankoraŭ ne infektitan regionon de Ĉinio. La registaro de Honkongo rifuzis fermi la limojn kun la kontinenta Ĉinio, kiel tion postulis opozicio. Responde al tio protestantoj atakas fervojon kaj aliajn transportajn liniojn, kiuj ligas la insulon al la kontinenta Ĉinio, klopodante tiel obstakligi la trafikon.
Tutmonde la viruso trafis jam almenaŭ 15 landojn. Sud-Koreio, Germanio, Hispanio kaj Barato pripensas evakuadon de siaj civitanoj el Uhano, dum Usono faris tion hieraŭ, sendinte specialan flugon. 240 evakuitaj usonanoj flugis al Ontario (Kalifornio), ĉar en tiu urbo troviĝas flughaveno, antaŭ dek jaroj destinita de la registaro por akceptado de la evakuataj usonanoj. Ankaŭ Japanio sendis specialan flugon por evakui ĉirkaŭ 200 siajn civitanojn.
La flugkompanio United Airlines nuligis flugojn laŭ 24 itineroj al Ĉinio, inkluzive Honkongon. Usono proponis al Ĉinio akcepti teamon de usonaj fakuloj, kiuj helpos bridi la epidemion. En Japanio estas konfirmitaj tri infektiĝoj, inter kiuj estas maljuna ŝoforo de buso, kiu neniam vizitis Uhanon, sed dufoje veturigis ĉinajn turistojn en la gubernio Nara. La transportitaj de li turistoj montris neniujn simptomojn de malsano kaj jam revenis al Ĉinio. Antaŭtage en Germanio estis registrita kazo, kiam loka viro infektiĝis de sia ĉina kolego. Tio estas la unuaj kazoj de transiro de la viruso ekster Ĉinio de homo al homo.
Fontoj
- (angle) Cissy Zhou, William Zheng «China coronavirus: death toll hits 132 as number of cases surpasses that of Sars» – South China Morning Post, 29-01-2020
- (angle) Cissy Zhou, William Zheng «China coronavirus: Americans evacuated by plane from Wuhan, city at centre of deadly outbreak» – South China Morning Post, 29-01-2020
- (angle) Cissy Zhou, Danny Lee «China coronavirus: United Airlines cuts back China flights as disease worsens in Asia» – South China Morning Post, 29-01-2020
- (angle) Robert Delaney «China coronavirus: Washington asks Beijing for permission to send health team to battle outbreak» – South China Morning Post, 29-01-2020
- (angle) Robert Delaney «Japanese bus driver who had not visited China contracts coronavirus» – South China Morning Post, 28-01-2020
- (angle) Robert Delaney «China coronavirus: German man infected by colleague who had travelled to Wuhan» – South China Morning Post, 28-01-2020
- (angle) Kanis Leung «Hong Kong protesters disrupt MTR rail services, declare ‘dawn of anti-epidemic’ strikes over government’s handling of Wuhan coronavirus outbreak» – South China Morning Post, 29-01-2020
 |
Ĉi tiu artikolo estas pli ol sep tagojn malnova. Ĝi estas arĥivita kaj ne povas esti redaktata plu. Artikoloj en la arĥivo de Vikinovaĵoj spegulas la specifan momenton de sia publikiĝo, kaj ne celas inkluzivi pli novan informon nek eventojn poste okazintajn. Arĥivitaj artikoloj povas esti redaktitaj nur okaze de etaj eraroj nerilataj al la enhavo (ekz. misa ortografio aŭ interpunkcio). Por peti korekton, bonvole lasu mesaĝon sur la diskutpaĝo. |