Eksiĝis du jordaniaj ministroj pro malobeo de reguloj pri trudizoliĝo

Stokbildo de s-ro Bassam Talhouni, unu el la du ĵuseksiĝintoj.

Mardo, la 2-a de marto 2021

La jordaniaj ministroj pri internaj aferoj kaj justico eksiĝis dimanĉon la 28-an de februaro, post kiam oni trafis ilin malobeantaj kontraŭkronvirusajn regulojn pri trudizoliĝo.

Oni kaptis ministron pri internaj aferoj Samir Mobeidin kaj ministron pri justico Bassam Talhoŭni ĉeestantaj publikan bankedon kaj rompantaj socian distancadon kaj gvidlinojn pri maksimuma homkapacito — aferoj pri kies efektivigo iliaj respektivaj ministrejoj respondecas. Ĉi tiu incidento okazis kelkajn tagojn post la altrudo de novaj limigoj al jordanianoj, inkluzive de enhejma trudizoliĝo, elirmalpermeso efektivigata de l' armeo, kaj monpuno je 100 dinaroj por tiuj, kiuj ne portas maskojn survizaĝe.

Iliajn eksiĝojn akceptis ĉefministro Biŝer Al-Ĥasaŭneh, kaj reĝo Abdulah la 2-a per unu el du reĝaj dekretoj. Laŭ kelkaj raportoj, la dua dekreto aŭtoritatigis deputitan ĉefministron pri loka administrado Taŭfik Krejŝan ekestri la ministrejon pri internaj aferoj, kaj ŝtatministron pri leĝaj aferoj Aĥmad Ziadat ekestri la ministrejon pri justico.

Laŭ la novaĵagentejo Reuters, antaŭnelonga erupcio de novaj variantoj de la kronviruso rezultigis almenaŭ 4 627 mortojn kaj pli ol 300 mil infektiĝojn en la nacio, kiu havas dek mil loĝantojn. Oficialuloj atribuas la erupcion al jordanianoj malobeantaj la limigojn, kaj oni arestis dekojn pro rompo de ordonoj pri trudizoliĝo. Kiel plue raportis Reuters, centoj da negocoj estis fermitaj.

Fontoj

• (en)  «Ministers» – Hashemite Kingdom of Jordan, 01-03-2021 (dato de paĝaliro) (arkivita [ ])
• (en)  «Jordan's Justice, Interior Ministers Resign» – Asharq Al-Aswat, 28-02-2021 (arkivita [ ])
• (en) Suleiman Al-Khalidi «Two Jordanian ministers fired for partying in breach of their own rules» – Reuters, 28-02-2021 (arkivita [ ])
• (en) Laith al-Junaidi «Jordan: 2 ministers resign for violating virus measures» – Andalou Agency, 28-02-2021 (arkivita [ ])

Vi povas disvastigi ĉi-tiun artikolon per Interkonaj retejoj

Ĉu vi havas opinion pri temo de la artikolo? Esprimu ĝin!

Serva informo pri ci-tiu paĝo:   • Mallonga ligilo • • Informo pri ĉi-paĝo